Ginkumpirma sang Department of Health (DOH) nga may 38 ka Pinoy crew members sa Atlantic cruise ship sa coast sang west Africa kun sa diin ginasuspetsahan nga may hantavirus outbreak nga ginkamatay sang tatlo na ka tawo.
Sa update sang DOH, ginsiling nga safe ang mga Pinoy kag wala sang nagpositibo sa amo nga virus sandig sa report sang World Health Organization (WHO).
Suno kay DOH spokesperson Undersecretary Albert Domingo, nagapadayon man ang ila koordinasyon kasunod sang amo nga suspected outbreak.
Magluwas nga tatlo na ka pasahero ang napatay sa amo nga Atlantic cruise ship, may tatlo man ka iban pa nga na-infect.
Ginaplanuhan naman sang medics ang evacuation agud nga masiguro ang safety sang ginabanta 150 ka mga pasahero nga sakay sa barko.
Sa subong nga 2026 suno sa DOH, wala sang na-rekord nga kaso sang hantavirus sa Pilipinas.
Ang hantavirus amo ang infection nga nagalaton paagi sa mga ilaga pakadto sa tawo.
Ang sintomas sini amo ang hilanat, ang palanakit sang ulo kag kaunuran kag tiyan, kag pagpalanuka.
Mahimo man magsunod ang ubo, kabudlay sa pagginhawa, pagdamo sang fluid sa baga nga sa Malala nga mga kaso sundan pa gid sang hantavirus cardiopulmonary syndrome (HCPS), haemorrhagic fever with renal syndrome (HFRS), low blood pressure, bleeding disorders, kag kidney failure.
Ginapanawagan sang DOH ang publiko nga indi mag-panic sa sini nga rodent-related infection kag wala man sang dapat nga ika-alarma.#
