Nagpahanumdom ang isa ka mental health expert nga subong nga mainit ang tyempo madamo sang mga butang ang dapat ikonsiderar ilabi na sa pagdumala sang mental health.
Sa interview sang Bombo Radyo kay Francis Ray Subong, isa ka mental health professional, iya ginpahayag nga tuman ka importante nga ang isa ka tawo makahibalo kun paano sini dumalahan kag protektahan ang iya kaugalingon.
Suno pa kay Subong nga may mga bagay nga makontrol kag indi makontrol ang isa ka tawo subong nga tag-ilinit apang importante suno sa iya nga mas maayo gid nga nakapreparar ini inkaso may mag-abot nga mga pagpanghangkat.
Pahayag pa sini nga kinahanglan man ang pagbinuligay subong kag indi gid tuman nga magkabalaka sa mga bagay nga maka-trigger pa sa mental health bangud makapalain ini sa ikaayong lawas.
Dugang pa ni Subong nga importante man ang pag-inom sang madamo nga tubig, pag-atipan sang kaugalingon kag pagpahuway sa insakto nga oras agud nga mangin maayo ang balik sini sa panghunahuna sang isa ka tawo.
