Nabudlayan nga maghangop sang ila ginabasa ang masobra sa isa ka milyon nga mga estudyante sa Grade 11 sa bilog nga pungsod.
Ini ang sandig sa bag-o nga report nga ginpaguwa sang Second Congressional Commission on Education (EDCOM 2). Ginbase ini sa March 2026 Senior High School literacy assessment sang Department of Education (DepEd).
Sa amo nga assessment, 1.3-million sa 1.4 million ka mga estudyante sa Grade 11 nationwide ang nabudlayan nga mag-intindi kun ano ang ila nga ginabasa.
Suno sa EDCOM 2, 12% lamang sang learners sa Grade 11 ang makabig nga independent learners ukon ang learners ukon readers nga makahangop sandig sa expectation nga gina-set para sa amo nga Grade level.
Sa sini man nga numero, anum sa kada 10 ka mga estudyante ang naga-tupa naman sa “frustration level”. Ini ang ginatawag nga lowest tier of literacy kun sa diin virtually non-existent ang comprehension sang bata.
Halos tatlo naman sa 10 ka mga bata ang yara sa “instructional level” — buot silingon, nagakinahanglan sila sang manunudlo agud nga giyahan sila nga mahangpan kun ano ang ila ginabasa.
Bangud sini, nagpanawagan ang isa ka kongresista sa DepEd nga magtutok sa pagsabat sa problema sa reading comprehension sa baylo sang pag-implementar sang bag-o nga mga polisa.
Pagkatapos sang hearing sang Committee on Basic Education sa Kamara, nagpahayag si Pasig Rep. Roman Romulo nga basi kinahanglan anay nga magbalik ang DepEd sa basics kag solbaron ang mga problema sa reading comprehension sang mga kabataan.
“DepEd should decide how to resolve this problem […] maybe this should be the priority first: reading, reading, reading, reading comprehension, mathematics,” suno kay Romulo.
“Maybe we should focus first on the more basic […] DepEd should lay down a proposed solution so that we may address this problem of reading comprehension,” dugang sini.
Suno naman kay ACT Teachers party-list Rep. Antonio Tinio, bisan madamo ang ugat sang problema sa comprehension, nakit-an nga napalpak ang K-12 program sa pag-address sa naganubo nga proficiency kag skills.
“Imagine, 88 percent of incoming Grade 12, Senior High School, or those entering the last year of their senior high school, are not proficient readers,” pahayag sini.
“The problem is systemic. You cannot say that this is caused by one factor only, but by the entire system — from the incentives at all levels, from the individual, from the teacher level, to the school level, up to the entire system — that created this situation,” dugang sang kongresista.
Sa nagligad nga mga tuig, may mga panawagan nga bag-uhon ukon repasuhon ang programa nga K-12 bangod may pila ka mga eksperto nga nagapati nga ang dugang nga duha ka tuig wala nakabulig sa pagsolbar sang malain nga performance sang mga estudyante nga Pilipino kon ikumparar sa mga pungsod nga kasilingan sa rehiyon.
Isa ka report sang United Nations Children’s Fund sang 2023 ang nagpahayag nga kinahanglan nga pauswagon ang potensyal sang early childhood education. Suno sa amo nga report, sa Southeast Asia, ang abilidad sang mga estudyante sa Grade 5 sa Pilipinas sa pagbasa kag matematika amo ang ikaduha sa pinakamanubo — mas manubo pa sa Myanmar nga naapektuhan gani sang gyera.
Sang Disyembre 2023, nagsiling man ang Programme for International Student Assessment ukon PISA nga ang mga estudyante nga Pilipino nga nangin kabahin sa ila assessment ang nagapangulihot sang lima tubtub anum ka tuig sa ila kapareho nga mga estudyante nga naga-edad 15 anyos halin sa kadam-an nga participating countries sa matematika, siyensya, kag pagbasa.#
PHOTO: WALTER BOLLOZOS
