Ginkumpirma sang Philippine Atmospheric, Geophysical and Astronomical Services Administration (PAGASA) nga nagtuhaw na ang El Niño conditions sa tropical Pacific.
Suno sa press release nga ginpaguwa sang ahensya subong nga Martes, Hunyo 9, nakalab-ot na sa +0.5°C threshold ang sea surface temperature anomalies sa tropical Pacific sa Mayo 2026.
Ini nga lebel ang mahimo na maangot sa pagsugod sang El Niño conditions.
Sandig sa madamo nga climate models suno sa weather bureau, masobra na sa 80% ang posibilidad nga maga-develop ini sa full-blown El Niño nga kondisyon kag magapadayon tubtub sa temprano nga bahin sang 2027.
Ang El Niño amo ang mainit nga phase sang El Niño-Southern Oscillation (ENSO).
Mabatyagan ang mas mainit sangsa kinaandan nga sea surface temperatures sa central kag eastern equatorial Pacific kadungan sang cooler-than-average sea surface temperatures sa Philippine Sea.
Suno sa PAGASA, bangud sini nga developing conditions, mas mataas ang tyansa nga magalaka man ukon may below-normal nga pag-ulan sa kadam-an nga bahin sang pungsod — kondisyon nga magapamala sang duta sa vulnerable areas.
Apisar sini suno sa ahensya, possible gihapon ang pag-ulan ukon ang above-normal rainfall sa western sections sang Pilipinas kadungan sang southwest monsoon ukon “habagat” season ilabi na kun ginapabaskog sang tropical cyclone activity ukon bagyo.
Ginpahanumdom naman sang weather bureau sa mga ahensya sang gobyerno kag sa publiko nga mag-aligmat kag magpreparar ilabi na sa mga lugar nga ginabaha kadungan sang habagat season kag sa mga rehiyon naman nga masami nagakahalitan kun may dry conditions.
“All government agencies and the general public are strongly advised to take appropriate preparedness and response measures to mitigate their potential impacts, particularly in areas vulnerable to heavy rainfall and floods during Habagat season and those areas prone to below-normal rainfall conditions,” suno sa press release sang PAGASA.#
