Ginbalibaran sang Office of the Ombudsman ang rekomendasyon sang Department of Justice ukon DOJ may kaangtanan sa panumbungon batok kay Senador Joel Villanueva.
Ini kaangot sa ginaalegar nga involvement ni Villanueva sa flood control scandal.
Suno kay Ombudsman Jesus Crispin Remulla, kulang ang case buildup nga ginhimo sang DOJ, gani ang Ombudsman ang magahimo sang kaugalingon sini nga preliminary investigation antes magdesisyon kun may ipasaka nga kaso sa Sandiganbayan.
Ginsiling ni Remulla nga may awtoridad ang Ombudsman nga batunon ukon balibaran ang findings sang DOJ bangud ang amo nga ahensya ang nagabulig lamang sa imbestigasyon.
Ang reklamo nagasentro sa alegasyon nga ginmaniobra ni Senador Villanueva ang pag-pain sang P600-million para sa mga flood control projects sa Bulacan agud makabaton sang 30 porsyento nga komisyon.
Matandaan nga ini nga alegasyon ang ginpahayag sang mga anay opisyal sang DPWH sa mga hearing sang Kamara.
Ginkumpirmar man ni Senador Panfilo “Ping” Lacson nga may yara sang P600-million nga pondo para sa amo nga mga proyekto.
Una naman nga ginpanginwala ni Senador Villanueva ang tanan nga alegasyon batok sa iya.
Matandaan nga sang nagligad nga bulan, nauna na nagpahayag ang Ombudsman nga mapasaka ang kaso nga plunder batok kay Villanueva sa sulod sang duha ka semana bangud handa na ini para sa prosekusyon. Apang tubtob subong, wala pa sang kaso nga napasaka.
Sang Hunyo 19, ginpangayo man sang Samahan ng Progresibong Kabataan ukon SPARK ang sabat sa pagka-atrasar sang pagpasaka sang kaso. Suno sa grupo, naggwa ang delay sa tion nga ginreport nga nagsaylo si Villanueva sa Senate majority bloc nga ginapangunahan ni Senador Sherwin Gatchalian.
Padayon naman nga ginapanginwala ni Senador Villanueva ang tanan nga alegasyon batok sa iya.
