Ginpanindugan ni Ombudsman Jesus Crispin “Boying” Remulla nga wala sang labot sa pulitika ang pagproseso sang mga reklamo batok kanday Senador Joel Villanueva kag Senador Francis “Chiz” Escudero.
Ini kasunod sang desisyon sang Office of the Ombudsman nga indi pagbatunon ang rekomendasyon sang Department of Justice sa flood control-related complaint batok kay Villanueva.
Bangud sini, ang Ombudsman ang magahimo sang kaugalingon nga preliminary investigation antes magdesisyon kon may ipasaka nga kaso sa Sandiganbayan.
Samtang, suno kay Remulla, yara naman sa preliminary investigation ang flood control-related complaint batok kay Senador Escudero.
Si Escudero isa sa mga ginatudlo sang state witness kag anay DPWH Undersecretary Roberto Bernardo nga nalakip sa ginapahayag nga iregularidad sa mga flood control projects.
Suno kay Bernardo, may negosyante nga naghingyo sa iya nga magsumiter sang listahan sang mga proyekto nga isulod sa General Appropriations Act, nga may ginapahayag nga 20 porsyento nga komisyon para kay Escudero
Gin-alegar man niya nga personal niya nga gin-deliver ang 160 ka milyon kag 120 ka milyon ka pesos sa opisina sang negosyante sa Manila.
Apang ginpanginwala ni Senador Escudero ang tanan nga alegasyon kag ginsiling nga wala siya sang direkta nga kaangtanan sa sini nga transaksyon.
Samtang, ginpaathag naman ni Remulla nga wala sang ginahimo nga kasugtanan ang Ombudsman sa bisan kay sin-o may kaangtanan sa ila mga kaso.
Suno sa iya, ang tanan nga legal nga proseso kag desisyon himuon sa korte kag indi sa pulitika.
Matandaan nga pareho sanday Villanueva kag Escudero nga kaalyado anay sang faction nanday Senator Alan Peter Cayetano apang pareho man nga nagsaylo sa majority bloc sa Senado nga amo ang iya ni Senate President Sherwin Gatchalian.
