Patay ang isa ka ka tigulang matapos natabunan sang duta sa natabo nga landslide sa Nagba, Tubungan, Iloilo.
Ang biktima amo si Placido Tabalina, 67-anyos, residente sang nasambit nga lugar.
Nagluntad ang landslide kasunod sang pagbubo sang mamunog nga ulan sa madamo nga parte sang Iloilo kagab-i.
Sa interview sang Bombo Radyo kay Tubungan Vice Mayor Leo Cezar Taypen, iya ginpahayag nga yara gid sa tupad gid sang banglid ang balay sang pamilya sang biktima.
Suno kay Taypen, nagakatulog gid sa balcon sang balay ang ang tigulang sang natabo ang landslide kag natampukan ini gilayon sang duta.
Maswerte naman nga nakaluwas ang iban nga mga myembro sang pamilya nga nagakatulog man sa sulod sang balay.
Ginpahayag sang bise-alkalde nga natalana na kuntani ipaidalom sa preemptive evacuation ang pamilya sang biktima bangud high-risk sa landslide ang nasambit nga lugar apang bangud nga wala man maarapalan sa kadamuon sang residente nga i-evacuate, naulihi ang pagpa-evacuate sa ila.
Gindugang naman ni Taypen nga sa subong, masobra na sa 30 ka pamilya ang napang-evacuate.
Suno pa kay Taypen, sa 48 ka barangays sa Tubungan, 86% gid ang highly susceptible sa rain-induced landslide samtang ang nabilin nga barangay amo ang prone naman sa pagbaha.
