Nagpasaka sang lima ka separado nga mga complaints sa Ombudsman ang Amlig Antique Alliance nga isa ka koalisyon sang environmental advocates.
May kaangtanan ini sa ginaalegar korapsyon kag mga proyekto nga ginpatuman apang ginaalegar nga tuman ka makahalalit sa dunang-manggad sa Antique.
Gin-file ang complaints batok sa mga opisyal sadto kag subong sang Department of Public Works and Highways Region VI, DPWH Antique District Engineering Office, kag Department of Environment and Natural Resources-Environmental Management Bureau Region VI.
Nalakip man sa ginpasaka nga complaints amo sanday USWAG Ilonggo Rep. Jojo Ang Jr., former Ako Bicol Rep. Zaldy Co, negosyante nga si Alfonso Tan, mga executives sang Sunwest Inc., International Builders Corp., J.E. Tico Construction Co., Allencon Development Corp., kag A.M. Oreta & Co.
Suno sa coalition, ang ginatumod nga mga proyekto ang ginpatuman humalin pa sang 2019 tubtob 2025 nga ginapatihan nga nagalapas sa kasuguan kaangay sang environmental laws kag procurement rules.
Pila sa mga ginareklamo nga mayor nga infrastructure projects amo ang masunod: Funda-Dalipe Coastal Road, Seawall and Esplanade sa San Jose de Buenavista; Pandan-Ibajay Road; Maybunga-San Ramon Road; Laua-an Ridge View to Aklan River Road; kag Antique section sang Panay East-West Road sa Valderrama.
Suportado naman sang Kahublagan Kontra Kurapsyon (KKK) kag iban nga advocates sa bilog nga Panay ang tikang sang Amlig Antique Alliance.
Suno sa KKK, ini nagamarka sang una nga phase sang ginalauman nga isa sa pinakadako nga citizen-led anti-corruption kag environmental accountability campaigns sa Western Visayas.
Suno pa sa KKK, may dugang pa nga mga complaints nga ginapreparar kun sa diin sakop sini ang yara sa 91 ka government contracts nga kapin P7.3 billion nga gin-implementar humalin 2017 tubtob 2025.
