Ginsulod gid sang tubig-baha ang munisipyo sang Jordan, Guimaras kasunod sang mamunog nga pag-ulan dala sang Habagat nga ginpabaskog pa sang Bagyo Kiyapo.
Sa interview sang Bombo Radyo kay Mayor John Edward Gando, iya ginpahayag nga halin sang kaagahon ang pagbubo sang mamunog nga ulan kag nag-subside alas otso tubtub alas nueve sa aga subong nga adlaw, Hulyo 24.
Suno kay Gando, apektado sang baha ang atubang sang munisipyo nga sakop sang Barangay Rizal kag manubo nga porsyon sang Barangay Poblacion.
Pahayag ni Gando, amo ini ang problema sa ila banwa sa kada magbaskog ang ulan bangud catchment area sang baha ang atubang sang munisipyo kag nagkitid pa ang suba amo nga indi maayo makaguwa ang tubig sa baba sang suba malapit sa RoRo Wharf sa Barangay Hoskyn.
Suno pa sa alcalde, ginpapauli naman ang tatlo sa apat ka pamilya nga nagbakwit matapos nga nag-sanaaw ang tyempo.
Ginhawiran lamang sa simbahan malapit sa munisipyo ang isa ka pamilya nga may pito ka myembro bangud nga nagapauli sila sa isolated area. Hulaton-hulaton lang suno kay Gando nga magtawhay ang tyempo antes sila papuli-on sa ila nga balay.
Nahibaluan nga kanselado man ang klase subong nga adlaw sa amo nga banwa bangud sa malain nga tyempo.#
