Naglab-ot na sa 2,403 ang kaso sang dengue sa probinsya sang Iloilo kun sa diin 10 na ang reported nga napatay bangud sa amo nga sakit subong nga tuig.
Sa interview sang Bombo Radyo kay Dr. Rodney Labis, chief sang Health Service Delivery Division sang Iloilo Provincial Health Office, iya ginpahayag nga alarming na ini nga sitwasyon bangud naglab-ot na ini sa outbreak level.
Pinakadamo nga kaso ang na-report sa banwa sang Estancia kun sa diin naglab-ot na ini sa 197 ka kaso kun sa diin tatlo ang napatay.
Ginsundan ini sang banwa sang Calinog nga may ara sang 174 ka kaso, banwa sang Cabatuan nga may ara sang 153 ka kaso kag Passi City nga may ara naman sang 132 ka kaso sang Dengue.
Suno pa kay Dr. Labis, apektado ang tanan nga age group apang pinakamataas ang kaso sa mga bata nga naga-eded sang 5-9 years old kag kalabanan diri amo ang kindergarten kag sa elementarya.
Nagpahanumdom naman si Dr Labis sa mga ginikanan nga dapat hatagan sang igtalupangod ang mga bata kun naka-eksperyensya ini sang mataas nga hilanat, pagpalanakit sang mata, nagasuka kag tuman nga pagpangluya.
Dugang pa ni Labis, kun dehydrated naman ang pasyente kag wala ini nakapangihi sa sulod sang tatlo ka oras kinahanglan man nga dal-on gilayon ang pasyente sa pinakamalapit nga health center.
