Magadala ang Philippine boxing team sang apat ka Olympic medalists sa Asian Games sa Aichi-Nagoya, Japan, sa pagtinguha nga tapuson ang 16 ka tuig nga kauhaw sang Pilipinas sa gold medal sa amo nga continental meet.
Suno kay Association of Boxing Alliances of the Philippines (ABAP) president Marcus Manalo, pito ka boksingero ang maga-representar sa Pilipinas nga pangunahan nanday Nesthy Petecio sa 60 kilograms; Aira Villegas sa 51 kilograms; Carlo Paalam sa 55 kilograms; kag Eumir Marcial sa 80 kilograms.
Si Marcial nga bronze medalist sa Tokyo Olympics amo ang nagaisahanon nga Filipino boxer nga nakakuha sang medalya sa nagligad nga Asian Games.
Subong nga tuig, magadepende pa ang iya partisipasyon sa mangin resulta sang iya professional fight sa Los Angeles sa September 19.
Duha lamang ka adlaw pagkatapos sang iya professional fight ang pagsugod sang boxing competition sa September 21, gani ginapaabot sang team nga mangin fit gihapon si Marcial kag makalupad diretso halin Los Angeles pakadto sa Nagoya.
Ang tatlo pa ka miyembro sang Philippine boxing team amo sanday Riza Pasuit sa 54 kilograms, Junmilardo Ogayre sa 60 kilograms kag Norlan Petecio sa 70 kilograms.
Ginkilala ni Manalo nga ang presensya sang apat ka Olympic medalists mahimo nga mangin bentaha ukon makahatag sang dugang nga pressure sa Pilipinas bangud sila ang target nga malutos sang iban nga pumalasakop.
Natapos na sang Philippine team ang duha ka semana nga training camp sa Thailand kag nagpadulong na sa Nagoya para sa mas malip-ot nga training camp antes magsugod ang kompetisyon.
Suno kay Manalo, produktibo ang ila training camp sa Thailand upod ang mga teams halin China, Jordan, Chinese Taipei kag host country nga Japan, samtang sa Japan magatutok sila sa sparring kag pag-adjust sa klima.
Katapusan nga nakadaog ang Pilipinas sang Asian Games boxing gold medal sang 2010 sa Guangzhou, China, paagi kay Rey Saludar sa 52-kilogram division. Halin sadto, nakakuha ang Filipino boxers sang tatlo ka silver kag lima ka bronze medals apang nangin maila na ang bulawan nga medalya.#
