Ginmandu sang Sandiganbayan Third Division nga dal-on sa UP Philippine General Hospital ukon UP PGH si anay House Speaker Martin Romualdez buwas, Setyembre 12, para sa independent examination sa iya ikaayong-lawas.
Suno sa korte, indi man dapat maka-impluwensya sa resulta sang examination ang mga doktor ni Romualdez halin sa Cardinal Santos Medical Center.
Antes sini, nagpungko bilang testigo si Dr. Rosalio Torres, overall coordinator sang medical team ni Romualdez, nga wala sang naka-schedule nga operasyon ukon invasive medical procedure para sa anay House Speaker.
Ginpahayag ini ni Torres sa Day 2 sang hearing sa motion ni Romualdez nga ipabilin siya sa ospital samtang ginapadayon ang kaso nga P7.4-billion nga plunder batok sa iya, may kaangtanan sa ginapatihan nga koneksyon sa kontrobersiya sa flood control projects.
Suno kay Torres, “none at the moment” sang ginpamangkot siya sang prosecution panel kon may yara bala sang gilayon nga operasyon ukon invasive medical procedure nga naka-schedule para kay Romualdez.
Apang sang ginpamangkot siya kon makumpirmar niya nga wala sang seryoso nga pamahog sa kabuhi ni Romualdez nga nagakinahanglan sang gilayon nga medical intervention, wala siya naghando.
Suno kay Torres, wala siya naga-ugyon sa amo nga pahayag base sa evaluation kag rekomendasyon nga iya ginkasugtan upod ang mga consulting specialists, lakip ang cardiologist, neurologist kag psychologist.
Madumduman nga Septyembre 7 sang gin-aresto si Romualdez samtang yara sa Cardinal Santos Medical Center. May nauna naman nga mandu halin sa Sandiganbayan nga naga-set sang detention sini sa New Quezon City jail sa Payatas.#
