Naghingyo si anay Executive Secretary Vic Rodriguez sa Supreme Court nga ideklarar nga “null and void” ang September 23 nga ruling sang Senate impeachment court sa trial ni Vice President Sara Duterte.
Sa amo man nga petisyon nga ginsapubliko subong nga adlaw, Septyembre 24, ginpangabay ni Rodriguez sa Korte Suprema nga magpaguwa sang temporary restraining order (TRO) batok sa amo nga ruling.
Matandaan nga sa desisyon sang Senate impeachment court, ginpanubo ang numero sang mga senador nga nalakip sa two-thirds vote agud nga ma-convict ang respondent.
Sa baylo nga tanan nga 24 ka senador ang ikonsiderar, gina-isip na lamang sa ruling ang mga senador nga legal kag factual nga makapartisipar sa proceedings.
Suno kay Rodriguez, ginapatuman sang Konstitusyon ang 2/3 sang tanan nga miyembro sang Senado bilang kinahanglanon para sa conviction — buot silingon, kun 24 tanan ang senador suno sa iya, 16 ka boto ang kinahanglan.
Ginapangabay man niya sa Korte nga ipahayag nga ang Article 11, Section 3, Paragraph 6 sang 1987 Constitution nagapatuhoy sa tanan nga 24 ka miyembro sang Senado.
Suno pa kay Rodriguez, indi mahimo sang Senado nga gamiton ang iya kaugalingon nga rules of procedure para bag-uhon ang constitutional basis sa pagkalkula sang kinahanglanon nga mga boto.
Ginapangabay man niya nga ibalik sang Supreme Court ang July 6 nga ruling sang presiding officer sang impeachment court nga si Senator Francis “Chiz” Escudero nga nagtalana sa 16 ka boto bilang conviction threshold.
Sa iya 24-page petition, ginpahayag ni Rodriguez nga wala nagahatag ang Konstitusyon sang otoridad para bag-uhon sang pinakaulihi nga ruling sang impeachment court ang kadamuon sang boto nga kinahanglan para sa conviction.
Suno sa iya, indi lamang ini pagbag-o sang procedure kundi apektado man sini ang constitutional threshold para sa conviction bangud nagadugang ini sang qualification sa pulong nga “all Members of the Senate”—nga wala man sang amo nga qualification sa Konstitusyon.
Dugang pa ni Rodriguez, ginakilala sang Konstitusyon ang Senado bilang isa ka body nga may 24 ka senador, kag ang pag-absent sang isa ka senador wala nagakahulugan nga indi na siya senador.
Nahibaluan nga may apat ka senador nga wala nakapartisipar sa impeachment proceedings.
Sanday Jinggoy Estrada kag Rodante Marcoleta pareho nga nagaatubang sang plunder charges kag detained sa Quezon City Jail samtang nagahulat sang trial.
Si Senator Loren Legarda yara sa madugay na nga medical leave sa France kag gina-imbestigahan man sang Ombudsman bangod sa plunder kag graft.
Samtang, si Senator Bato dela Rosa ang hungod nga nagpalagyo sa Senate premises matapos magpagwa ang International Criminal Court sang arrest warrant batok sa iya may kaangtanan sa madugoon nga drug war.#
