Patay ang isa ka Pinoy sa Saudi Arabia matapos nga nahulog sa oil field ang drone nga ginpatibusok sang air defense sang pungsod.
Suno sa energy ministry sang Riyadh, ginpuntariya sang drone nga iguon ang processing facility sa Shaybah oil field sa Eastern Province.
Bangud sa depensa sang nasyon, napunggan nila ang pag-atake apang sang nahulog na ang debris sang drone, nagtuga ini sang sunog sa salakyan nga ginapanag-iyahan sang kontraktor nga nagatrabaho sa field.
Nahamtang ang salakyan sa gwa sang perimeter sang pasilidad apang wala sang naapektuhan nga ano man nga operasyon.
Suno sa ministry, magluwas sa Pinoy, ginbawian man sang kabuhi ang isa ka Nepali national, kag may duha nga nasamaran nga natumod nga Pakistani kag Indian.
Nagpalab-ot naman sang sinsero nga pagpakig-unong kag simpatiya ang ahensya sa pamilya sang mga nagtaliwan, kag nagpabutyag man nga nagalaum sila sa madasig nga pag-recover sang mga pilason.
Wala pa sang update nga ginhatag ang Ministry of Energy kun ano nga entity ukon sa diin nga nasyon naghalin ang drone.
Natabo ang insidente sa tunga sang sunod-sunod nga missile kag drone strikes sang Houthi rebels sang Yemen nga makapila ka beses na nga nag-atake sa mga paluparan sang Saudi subong nga bulan.
Una na nga ginkumpirma sang Department of Foreign Affairs (DFA) nga nagsaka na sa pito ang numero sang mga Pinoy sa Saudi nga nasamaran bangud sa pagpang-atake sang Houthi. Tatlo sa ila ang nagapabilin sa kritikal nga kondisyon.
