Dismayado si Iloilo Fourth District Board Member Rolando Distura matapos makapila ka beses na nga wala nagatambong ang Sugar Regulatory Administration (SRA) sa mga committee hearing sang Sangguniang Panlalawigan, ilabi na sa mga diskusyon angut sa bulig para sa mga sugarcane farmers nga apektado sang ginapaabot nga very strong El Niño kag peste nga red-striped soft scale insect (RSSI).
Suno kay BM Distura, nagpadala sang imbitasyon ang Committee on Disaster Risk Reduction and Management sa SRA agud madiskusyunan ang ila mga programa kag posible nga assistance para sa mga mangunguma.
Apang, wala sang bisan nga representante ang ahensya nga nagtambong kag wala man sang pahibalo ukon response sa sulat nga ginpadala sang probinsya.
Pahayag ni Distura, luyag sang komitiba nga mahibaluan kon ano ang mga programa kag pondo sang SRA nga mahimo magamit sa pagbulig sa mga sugarcane farmers, ilabi na sa mga apektado sang El Niño kag RSSI infestation.
Ginkumparar man niya ang SRA sa Philippine Coconut Authority (PCA), nga may Memorandum of Agreement na upod kay Iloilo Governor Arthur Defensor Jr. para sa paghatag sang pondo para sa insurance sang mga coconut farmers.
Ini bangud nga wala siya sang nahibaluan nga konkreto nga bulig halin sa SRA nga nakalab-ot sa mga sugarcane farmers ilabi na sa 4th District kun sa diin nahamtang ang mga banwa nga may madamo nga sugar plantations.
Gin-recall man ni BM Distura nga sang nagligad nga ginpatigayon nga committee hearing angut sa RSSI infestation, gin-imbitahan man ang SRA agud nga ma-raise man ang kinahanglanon sang biosecurity measures agud mapunggan ang paglapta sang peste sa mga kabanwahanan, apang wala gihapon ang mga ini nakatambong.
Bangud sa liwat-liwat nga pagpalya sang SRA sa pagtambong kag paghatag sang solusyon sa mga nasambit nga problema sang mga mangunguma, nagpaandam si Distura nga posible nila nga ipalab-ot sa mas mataas nga awtoridad, lakip na sa Malacañang, ang ila mga concern agud makuha ang atensyon sang nasambit nga ahensya.
