Nagabalor sang P1,200 tubtob P9,500 ang mga lapida subong sa syudad sang Iloilo samtang nagahilapit ang pag-obserbar sang Pista Minatay sa Nobyembre 1 kag 2.
Ini ang naka-depende sa kadakuon, sa klase sang materyales, kag sa disenyo.
Sa interview sang Bombo Radyo kay Ellaine, isa ka nagabaligya ukon nagahimo sang lapida, iya ginpahayag nga nagasugod sa P1,200 ang pinakabarato nga ceramic lapida nga may takos nga 40 by 40 centimeters.
Samtang, ang standard nga lapida nga may kapareho nga takos kag nagabalor sang P2,500 amo ang ila best seller ukon pinaka-masami nga ginabakal sang mga kustomer.
Nagabalor naman sang P9,500 ang lapida nga may takos nga 50 by 60 centimeters.
Dugang pa ni Ellaine, may sarang pili-an ang mga kustomer sa ila luyag nga kadakuon, klase sang materyales, kag disenyo sang lapida, lakip na ang pagpa-customize sini.
May dugang nga bayad kun may ipabutang nga litrato kag quotes ukon teksto sa lapida.
Nahibaluan nga samtang nagapalapit ang Pista Minatay, ginapaabot nga magapadayon ang pagpangita sang mga pamilya sang bag-o nga lapida bilang pagdumdom kag pagpaayo pa sang pantyon sang ila nagtaliwan nga mga himata.
