Ginalantaw nga magasaka ang produksyon sang gatas sa Pilipinas sa masunod nga tuig bangud sa pagdamo sang mga baka, pagpalapad sang mga programa sang gobyerno kag pagtaas sang demand sa merkado.
Suno sa United States Department of Agriculture (USDA), posible nga magalab-ot sa 48,000 metric tons ang produksyon sang gatas sa 2027, halin sa 46,000 metric tons subong nga tuig.
Base man sa datos sang National Dairy Authority (NDA), nagdamo sang 6.55 percent ang dairy animals sa pungsod halin Enero tubtob Hunyo 2026, nga naglab-ot sa masobra 100,000.
Samtang, ginapaabot man nga magasaka sa masobra 219,000 metric tons ang konsumo sang gatas sa 2027 halin sa 212,000 metric tons subong nga tuig, bangud sa pagpalapad sang Milk Feeding Program sang gobyerno nga naga-target sa 4.6M ka benepisyaryo kag sa nagadamo man nga mga negosyo kaangay sang coffee shops.
Nahibaluan nga kabahin sa mga tikang sang gobyerno ang pag-import sang 1,600 ka Holstein-Jersey cows kag pagdugang sang dairy stock farms nga mangin sentro sang pagpadamo kag pag-atipan sang mga baka antes ini ipanghatag sa mga lokal nga mangunguma.
Apang, nagpaandam ang USDA nga may yara sa gihapon sang posibilidad nga maghinay ang produksyon sang gatas sa katapusan nga bulan sang 2026 tubtob sa masunod nga tuig bangud sa epekto sang El Niño.
