Wala sang may nakumpiskar nga ginadumilian nga items sa Mandurriao Public Cemetery subong nga Pista Minatay.
Sa interview sang Bombo Radyo kay Police Captain Greg Matutino, hepe sang Iloilo City Police Station 5, iya ginpahayag nga nangin matalunsay ang ila pagbantay sa amo nga patyo sa All Saints’ Day kag All Souls’ Day.
Suno sa hepe, nahangpan kag nahibaluan na sang mga pumuluyo kun ano ang pwede kag indi pwede dal-on kun magduaw sila sa ila nga mga minatay gani nga wala na ginbudlayan pa ang kapulisan kag mga naka-deploy nga mga personnel.
Nagapasalamat man sila sa mga bisita sa ila ginhatag nga kooperasyon.
Dugang sini, sa Forest Lake Memorial Park, may duha ka menor de edad nga nagpalapit sa pulis agud magpangita sa ila ginikanan kag natigayon man nga mabalik sa ila pamilya.
Nahibaluan nga apisar malaka na lang ang mga bisita sa mga patyo sa syudad subong nga Nobyembre 2, naka-deploy sa gihapon ang mga pulis tubtub pa sa Nobyembre 3.
Una na nga nangin masangkad ang information dissemination sa syudad nga istrikto nga dumilian sa mga patyo ang liquor and alcoholic beverages, highly combustible materials, drones and firearms nga wala sang proper security clearance, matalom nga mga bagay, videoke kag iban nga magahod nga sound devices, amo man ang gambling materials.#
