Magabuylog liwat ang Brotherhood of Christian Businessmen and Professionals (BCBP) sa ikaduha nga tuig para sa palaabuton nga Dugong Bombo 2026, nga pagahiwaton sa Iloilo Science and Technology University (ISAT U) – La Paz Campus sa Nobyembre 14, 2026.
Sa interview sang Bombo Radyo kay BCBP Western Visayas Area Managing Director Dr. Nathaniel Chan, iya ginpahayag nga suportahan liwat sang organisasyon ang ginakabig nga pinakamadako nga blood-letting activity sa Pilipinas paagi sa paghatag sang mga boluntaryo kag pagdonar sang dugo nga magabulig sa mga nagakinahanglan sini, ilabi na ang mga pasyente sa mga ospital.
Dugang pa ni Chan, nagapati ang ila organisasyon nga ang amo nga aktibidad isa ka maayo nga ehemplo sang pagpakita sang pagkabalaka kag pagpalangga sa isigkatawo nga nagakinahanglan sang dugo.
Nahibaluan nga ang Dugong Bombo: “A Little Pain, A Life to Gain” Nationwide Blood-Letting Event isa ka inisyatibo sang Bombo Radyo Philippines, in partnership with Bombo Radyo Philippines Foundation Inc., kag Philippine Red Cross.
Ang mga successful blood donors makabaton man sang limited-edition kag specially designed nga Dugong Bombo T-shirt, vitamins kag hot meals.
Nagpang-agda man ang amo nga organisasyon sa publiko nga magpakigbahin sa nasambit nga aktibidad agud makadugang sa suplay sang dugo kag makabulig sa pagluwas sang kabuhi sang mga nagakinahanglan sini.
