Maga-upod ang Iloilo Provincial Government sa patigayunon nga fourth quarter Nationwide Simultaneous Earthquake Drill (NSED) alas-9 bwas sa aga, Nobyembre 5.
Sa interview sang Bombo Radyo kay Dr. Alfonso R. Baldonado III, ang officer-in-charge sang Provincial Disaster Risk Reduction and Management Office (PDRRMO), iya ginpahayag nga katuyuan sang drill nga makit-an kag masolusyunan kun ano ang kakulangan sa pagpanghanda sang Kapitolyo pananglitan may linog.
Ang mangin senaryo bwas amo ang pagluntad sang magnitude 7 nga linog.
Suno kay Baldonado, may yara sang mga biktima nga iga-rescue halin sa nagkalain-lain nga parte sang building.
Maga-upod man ang responders sang Iloilo kag ang maga-check sang building integrity agud malantaw kun mahimo na makasulod ang mga personnel kag mga kliyente.
May communication exercise man agud nga mahibaluan ang dead spots sang radyo para nga preparahan ang posibilidad sang pagka-utod sang suplay sang kuryente.
Nahibaluan nga ginapangunahan sang Office of Civil Defense (OCD) ini nga drills agud nga ma-test ang capabilities sang participating government agencies, emergency responders, kag local governments sa ila nga koordinasyon sa nagkalain-lain nga emergency response operations.#
