Ginpanindugan ni Iloilo City Lone District Rep. Julienne “Jamjam” Baronda nga wala sang malain sa budget insertions kun ginagamit lang man ini sang husto.
Sunod nga ginhinambit ni Baronda bilang ehemplo si former Senate President Franklin Drilon nga nag-ako nga may insertions ini sa Department of Public Works and Highways (DPWH) budget partikular na sa pagtukod sang Iloilo Sunset Boulevard.
Ini nga pahayag sang kongresista ang sa tunga sang mga kwestyon sa budget insertions sa Kongreso ilabi na bangud padayon pa subong ang deliberasyon sang proposed budget para sa 2027.
Sa interview sang Bombo Radyo kay Baronda, iya ginpahayag nga sa kada district nga nagasumiter sang ila proposal, 10-15% lang ang mapondohan sa baylo sang 100%.
Nagpangabay man si Baronda nga tutukan kag bantayan ang tanan nga implementasyon sang mga proyekto subong.
Ini ang rason suno sa iya kun ngaa may People’s Meeting nga ginpatigayon kahapon agud nga ma-address ang mga problema sa syudad partikular na ang problema sa baha.
Ang amo nga meeting gintambungan sang civil society organizations kag government agencies, lakip na ang Office of Civil Defense, Department of Public Works and Highways, Department of Environment and Natural Resources, kag ang City Disaster Risk Reduction and Management Office.
