Sa nagahilapit nga Dugong Bombo: “A Little Pain, A Life to Gain” Nationwide Blood-Letting Event!, nagpabutyag na sang ila commitment sang partisipasyon ang pila ka mga grupo kag taga-supporta sang Bombo Radyo Iloilo.
Sa interview sang Bombo Radyo kay Melanie Segunla, myembro sang PHILBIKERS San Joaquin, iya ginpahayag nga siya mismo ang maga-donor sang iya dugo sa Dugong Bombo sa Nobyembre 14, 2026, nga pagatigayunon sa Iloilo Science and Technology University, La Paz, Iloilo City.
Suno kay Segunla, ang pagbulig indi lamang dapat sa pinansyal nga aspeto, kundi mahimo man paagi sa paghatag sang dugo para sa mga tawo nga nagakinahanglan sang bulig.
Ginpahayag man niya nga iya man gin-encourage ang iya pamilya kag mga kaupdanan sa PHILBIKERS agud nga mag-upod kag magdonar man sa Dugong Bombo 2026.
Dugang pa, ginpabug-atan ni Segunla ang importansya sang pagbinuligay, bangud suno sa iya, maabot ang tion nga kita naman ang magakinahanglan sang bulig sang iban.
Sa pihak nga bahin, liwat man nga magapasakop sa Dugong Bombo 2026 ang mga Avid Fans of Bombo Radyo Iloilo.
Suno kay Mae Riza Beduyas, vice president sang nasambit nga grupo, iya ginpahayag nga pito na katuig nga nagahatag sang supporta ang ila grupo sa nagkalain-lain nga aktibidad sang Bombo Radyo Iloilo lakip na an tuigan nga Dugong Bombo sang Bombo Radyo Philippines, sa partnership sang Bombo Radyo Philippines Foundation, Inc. kag Philippine Red Cross.
Pahayag niya, siya man mismo ang maga-donate sang iya nga dugo bangud na-intindihan sini ang daku nga importansya sang paghatag sang bulig sa mga nagakinahanglan.
Ginpakigbahin man sini ang iya personal nga eksperyensya sa pagbulig sa isa ka pasyente nga nagkinahanglan sang dugo kun sa diin nagahilibion sa pagpasalamat ini matapos nga makabatun sang bulig nga dugo.
Bangud sini, ginpabug-atan ni Beduyas ang importansya sang pag-donate sang dugo ang isa ka simple nga paagi agud makabulig nga maluwas ang kabuhi sang isa ka tawo.
