Ginakabig nga eye-opener ni Iloilo City Vice Mayor Lady Julie Grace Baronda ang nagliligad nga natabo sa Iloilo City Council session bangud madamo ang nagatan-aw kag nagabantay sa mga nagakatabo sa session.
Ginnpahayag niya nga indi lang “mindful” kundi dapat mangin “compassionate” sa pagpakig-angot sa tagsa-tagsa matapos liwat nga nangin sentro sang atensyon ang pagpanagtag sang pamahaw subong nga adlaw, Nobyembre 11.
“Whatever we do there [City Council Session], people are watching, people are observing. Sometimes, biskan ano ta ka tago, magguwa gid,” pahayag ni Baronda.
Ginpahayag niya nga bisan ano pa ang himuon sang isa ka tawo, may posibilidad nga makita ini sang publiko kag may epekto sa iban, ilabi na sa mga wala ginapaabot nga maapektuhan sang amo nga aktwasyon.
Madumduman nga nangin kontrobersiya ang pagpanagtag sang snacks sa nagligad nga session matapos ginbawi ang tinapay nga yara na sa lamesa ni City Councilor Sheen Marie Mabilog.
Subong nga adlaw, may nagpadala sang pamahaw halin sa nagkalain-lain nga private establishments para sa mga konsehal kag personnel sang Sangguniang Panlungsod.
Lakip sa ginpanghatag ang siopao, nga ginpadala man para kay Baronda kag Mabilog. Apang wala nakabaton si Mabilog bangud wala ini nakatambong sa session tungod may prior commitment ini.
Text by: Bombo Cyrene A. Nasis
