Ginakabig nga kadalag-an kag bugal sang West Visayas State University (WVSU) ang pagkilala nga nabaton ni Dr. John Erwin P. Pedroso, Associate Dean sang WVSU College of Education Graduate School, matapos siya pasidunggan sang Merit Award sa Basic Research Category para sa Social Sciences, Humanities, Education, International Policies, and Governance.
Nabaton ni Dr. Pedroso ang amo nga pagkilala sa 2026 IDLAB Awards nga gin-organisar sang Regional Research, Development, and Innovation Committee sang Regional Development Council VI (RDC VI).
Sa interview sang Bombo Radyo kay Dr. Pedroso, iya ginsaysay nga ang award indi lamang personal nga pagkilala kundi nagadala man sang responsibilidad nga ipadayon kag mapauswag ang iya mga research.
Suno sa iya, importante ang kolaborasyon sa paghimu sang isa ka research rason iya ginapasalamatan sang daku ang bulig sang iya mga kaupodanan kag mentors sa pag-develop kag pagpublikar sang iya mga research papers.
Pahayag pa ni Dr. Pedroso, wala ini naglaum nga magdaog sa nasambit nga award apang, iya sa gihapon nga ginpadayon ang pagpasa sang iya mga dokumento sa bulig man sang iya mga abyan kag estudyante.
Ginpahayag man niya, sang iya na nabatun ang pagsidungog, daku ang kalipay nga iya nabatyag.
Pagpaathag pa niya, bisan daw mamaga-an lamang tan-awon ang trophy, mabug-at naman ang responsibilidad nga kaupod sini.
Ginpunto ni Dr. Pedroso, kinahanglan ipadayon ang research kag mapasa sa masunod nga henerasyon ang importansya sini bangud suno sa iya, ang paghimo sini ang mangin innovation ukon invention agud makakita kag masolbar sang mga kakulangan kag problema sa komunidad.
Ginpakigbahin man ni Dr. Pedroso nga isa sa pinakadaku nga kalipay bilang manunudlo amo ang makita nga ginakabuhi sang iya mga estudyante ang mga leksyon nga ila natun-an sa iya kag ginagamit man sa ila kaugalingon nga pagtudlo.
Isa man ka kalipay para sa iya nga makita ang iya mga anay estudyante nga nangin manunudlo na kag ginapadayon ang mga pamaagi kag prinsipyo nga ila natun-an sa iya klase.
Antes mangin manunudlo si Dr. Pedroso sa WVSU-Main Campus, nga amo man ang iya alma mater, nagtudlo anay ini sa nagkalain-lain nga mga buluthuan.
Sa subong, magasulod na siya sa ika-14 ka tuig sang iya pagtudlo sa nasambit nga unibersidad.
Ginapangamuyo man ni Dr. Pedroso nga kabay pa hatagan siya sang maayo nga lawas agud nga makapadayon pa sa pagtudlo, pag-ubra sang mga research kag paghatag sang kaalam sa iban pa nga mga estudyante.














