Posible na nga ma-apprehend kag maga-atubang sang multa ang mga nagabaligya sang sigarilyo nga “tingi-tingi” sa Iloilo City pagsulod sang 2027.
Ini kasunod sang mas hugot nga pagpatuman sang existing anti-smoking ordinance sang siyudad.
Gin-athag ni Iloilo City Anti-Smoking Task Force (ICAST) Director Iñigo Garingalao nga indi na bag-o ang pagsulundan bangud nakasaad na ini sa Regulation Ordinance No. 2021-255 ukon Comprehensive Anti-Smoking and Vaping Ordinance of Iloilo City, nga nagadumili sa pagbaligya sang sigarilyo nga ginakuha sa original nga pakete kag ginabaligya kada stick.
Suno kay Garingalao, padayon anay nga ginapahibalo ang mga seller kag publiko agud mahatagan sila sang tion nga makasunod sa regulasyon antes ang mas hugot nga pagpatuman sini.
Apang, posible na nga magresulta sa apprehension ang padayon nga paglapas sa ordinansa sa 2027.
Ginpaathag man niya nga isa sa mga rason sa pagdumili sang tingi-tingi nga pagbaligya amo nga indi na makita sang mga konsumidor ang graphic health warnings nga ginamandato sang Republic Act No. 10643 ukon Graphic Health Warnings Law kon ginakuha ang sigarilyo sa original nga kaha kag ginabaligya kada stick.
Ginbase man ang polisiya sa Republic Act No. 11223 ukon Universal Health Care Act nga nagahatag sang mandato sa gobyerno nga magpatuman sang mas hugot nga mga tikang para maprotektahan ang panglawas sang publiko, lakip na ang pagpugong sa paggamit sang tobacco kag alcohol.
Dugang pa ni Garingalao, indi ini anti-poor nga polisiya kundi isa ka tikang para mapunggan ang mas mahapos nga pag-access sang sigarilyo, ilabi na sang mga kabataan kag estudyante, bangud bisan isa lamang ka stick mahimo na nila mabakal.
Samtang, suno sa public advisory sang ICAST, indi lamang ang pagbaligya sang sigarilyo per stick ang ginadumilian sa idalom sang ordinansa.
Lakip man sa mga ginadumilian ang:
1. Pagbaligya sang kaha nga kulang sa 20 ka sticks ukon wala sa original nga packaging
2. Pagbaligya sulod sang 100-meter radius halin sa mga eskwelahan, ospital, plaza kag iban pa nga lugar nga ginatipunan sang mga pamatan-on
3. Open display sang sigarilyo kag vape
4. Pagbutang sang posters ukon advertisements sang sigarilyo kag;
5. Pagbaligya sini sa mga menor de edad ukon nagaedad 18 anyos panubo.
Ang mga establisemento nga magalapas sa ordinansa mahimo mag-atubang sang multa nga P5,000 kag/ukon suspensyon, pagsira ukon pagbawi sang business permit, suno sa nasambit nga public advisory.
Gani, ginapanawagan sang ICAST ang mga tag-iya sang sari-sari stores, groceries, convenience stores kag iban pa nga retail outlets nga sundon ang regulasyon agud malikawan ang penalidad kag mabuligan ang kampanya para sa smoke-free Iloilo City.
Text: Bombo Cyrene Nasis














