Ginpaathag sang isa ka law professor ang ethics complaint nga gin-file batok kay Sen. Bato. dela Rosa nga nakit-an sang Senate Committee on Ethics and Privilege nga ‘sufficient in form and substance’.
Ang grupo nga “Wag Kang KuCorrupt” movement nga ginapangunahan ni Atty. Barry Gutierrez kag UP Professor kag Former Finance USec. Cielo Magno amo ang nagduso sang nasambit nga reklamo.
Sa interview sang Bombo Radyo kay Atty. Jeremy Moreno, Law Professor sang University of San Agustin College of Law, iya ginpahayag nga may basehan na ang committee nga magpadayon sa imbestigasyon natuhoy sa reklamo.
Iya man ginpahayag nga kun ‘sufficient in form’, buot-silingon, “under oath” ang pag-execute sang complaint, gani beripikado na ini.
Sa pihak nga bahin, gindetalye man ni Moreno nga kun ‘sufficient in substance’, nalakip ang tanan nga pamatuod sa mga alegasyon batok sa ginareklamo.
Dugang pa niya, bangud sa amo ni nga gin-aprubahan, nag-issue na sang subpoena ang committee kag ginakinahanglan na nga magsabat si Sen. dela Rosa sa sulod sang 15 ka adlaw.
Madumduman nga anum na ka bulan nga wala nagapakita si dela Rosa sa publiko pagkatapos ang “shooting” sa sulod sang Senado sang Mayo 13.
Ini ang kasunod sang eksena nga paglagsanay sang Mayo 11 matapos nga gintinguhaan siya nga arestuhon sang mga ahente sang National Bureau of Investigation (NBI).
Nahibaluan nga gindagdagan sang International Criminal Court (ICC) si Dela Rosa sang arrest warrant kaangot sa crimes against humanity case nga ginapangatubang man ni former President Rodrigo Duterte kasunod sang implementasyon sang maduguon kag kontrobersyal nga drug war.














