Nagtaas na ang Maternity Care Benefits packages sang Philippine Health Insurance Corporation (PhilHealth) lakip na ang pagpasangkad sang coverage para sa prenatal kag childbirth services agud mas madamo nga makabenepisyo nga mga miyembro.

Sa interview sang Bombo Radyo kay Janimhe Jalbuna, head sang public affairs sang PhilHealth Region 6, iya ginpahayag nga ang Normal Spontaneous Delivery package nga nagabalor lang anay sang P9,750, yara na sa subong sa P29,000.

Samtang, ang Caesarean Section package, halin sa P37,050, nagtaas sa P58,000, kag ang Dilation and Curettage naman, halin sa P21,450, yara na sa P36,500.

Suno kay Jalbuna, ini nga mga benepisyo ang sarang ma-avail sa mga PhilHealth-accredited hospitals.

Pahayag niya, ginpasangkad man sang PhilHealth ang coverage agud indi na kinahanglan nga sa pareho nga pasilidad magpa-prenatal check-up kag magbata ukon mag-labor ang pasyente.

Ini bangud nga kon sadto, kinahanglan nga sa pareho nga health facility magpa-prenatal kag magbata ang pasyente, mahimo na subong nga maglain ang pasilidad kun sa diin nagapa-check up kag ang ospital nga ginbataan ukon nag-labor, kag covered gihapon ini sang PhilHealth

Dugang pa, may yara man sang prenatal care package nga nagabalor sang P12,050, nga nagalakip sang walo ka prenatal check-ups, vitamins, vaccination, diagnostic tests kag ultrasound para sa nagabusong nga pasyente.