Gin-athag sang Malacañang nga alternatibo lamang nga source sang pagkaon kag enerhiya ang Estados Unidos para sa Pilipinas.
Ini ang kasunod sang pahayag ni US President Donald Trump nga magakuha ang pungsod sa Amerika sang 100 porsyento sang kinahanglanon sini nga enerhiya kag mga produkto sa agrikultura.
Suno kay Palace Press Officer Claire Castro, makabulig ang madamo nga mapilian nga supplier agud mapanubo ang presyo sang mga produkto, malikawan ang pagsaka sang inflation, kag masiguro ang bastante nga suplay sang pagkaon kag enerhiya.
Ginpaathag ni Castro nga importante nga may iban pa nga makuhaan sang suplay ang pungsod bangud sang tensyon sa Middle East kag ginapaabot nga epekto sang mabaskog nga El Niño nga mahimo makaapekto sa suplay kag presyo sang mga kinahanglanon nga produkto.
“Ang nais ng Pangulo ay makakuha ng mga kailangan ng bansa sa mga source na mas makakapagbigay ng murang presyo ng mga produkto,” suno sa Palace official.
“Mas maraming source, mas mababang presyo. Mas maraming source, mas madaling maibsan ang pagtaas ng inflation rate. Mas siguradong food and energy supply,” paathag pa sini.
Ginakabig naman niya nga kadalag-an para sa Pilipinas ang pag-istoryahanay sang duha ka pungsod kaangot sa trade.
Ginpasiguro sini nga wala sang negatibo nga epekto sa lokal nga mga produkto, mangunguma, kag manugpaingisda ang bisan ano nga kasugtanan nga sudlan sang administrasyon ni Presidente Ferdinand Marcos Jr.
“Ang anumang transaksyon na papasukin ng pamahalaan ni Pangulo Marcos Jr. ay sisiguraduhin na hindi magbibigay ng negatibong epekto sa sarili nating mga produkto at sa ating mga magsasaka at mangingisda,” suno pa sa Palace press officer.#














