Ginakabig sang Archdiocese of Jaro nga isa ka regalo ang kabuhi ni Pope Francis sa kadam-an ilabi na sa Simbahang Katolika.
Sa interview sang Bombo Radyo kay Rev. Father Angelo Colada, Director sang Social Communication sang Archdiocese of Jaro, iya ginpahayag nga indi lamang basta regalo ang kabuhi ni Pope Francis kundi regalo ini nga naghalin sa Diyos.
Suno kay Colada, indi lang nagserbe nga pinakamataas nga lider sang simbahang Katolika sang Santo Papa, nagserbi man ini nga simple nga amay kag nagpahanumdom sa mga Pilipino sang pagkamalig-on sang pagtuo.
Dugang sini nga tuman ka dako ang nangin ambag sang Santo Papa sa Kristyanong katilingban.
Nagalaum man ini nga kasunod sang pagtaliwan ni Pope Francis, magapadayon sa gihapon ang ginbilin sini nga adbokasiya nga pagbulig sa mga ginsikway nga mga sektor sang katilingban.
Nahibaluan nga antes nagtaliwan si Pope Francis, naghimo ini sang iya katapusan nga pagpakita sa publiko sang Domingo sang Pagkabanhaw, Abril 20, sa diin naghatag siya sang blessings nga kilala bilang ‘Urbi et Orbi’ sa St. Peter’s Square.
