ILOILO CITY — Ginadayaw sang publiko ang pinasahi nga inisyatibo sang mga opisyal sang Brgy. Bantud, La Paz, Iloilo City, sa pagpatuman sang curfew ordinace may kaangtanan sa enhanced community quarantine.
Ini matapos nga duha sa ila mga opisyal ang makit-an kun gab-i nga nagasuksok sang costume nga daw kaangay sang mga aswang, nagalakat sa dalan, kag daw nagapamahog samtang may makahaladlok man nga musika nga ginapatunog sa trompa kag nagaserbe nga background.
Sa interview sang Bombo Radyo kay Punong Barangay Marie Michelle Paloma sang nasambit nga lugar, iya ginpahayag nga duha ang ila katuyuan sa pagduso sang amo nga istilo: una, mapahog ang mga pangayaw nga tuyo maglagaw sa ila barangay apisar sang curfew ordinance, kag ikaduha, makahatag sang kalingawan sa mga residente nga yara sa sulod sang puluy-an.
Suno kay Paloma, nahangpan niya nga madugay ang pagtinir sang mga tawo sa ila balay bangud sa quarantine period, gani mas maayo dugang niya kun mahatagan sila sang bisan gamay lang nga kalingawan.
Epektibo man suno kay Paloma ang ila nangin estratehiya.
Nagpanindugan man si Paloma nga disiplinado man ang mga tawo sa ila lugar apang luyag lang nila nga mapadayon ini nga batasan samtang may dala man nga good vibes sa tunga sang coronavirus pandemic.
Nahibaluan nga sa syudad sang Iloilo, masobra na sa isa ka libo ang nadakpan nga naglapas sa curfew ordinance kag nagpaandam man ang Iloilo City Police Office (ICPO) nga ini nga mga violators ang pasakaan sang nagakaigu nga kaso.
