ILOILO CITY – Ginpabugal ni President Ferdinand Marcos Jr. nga nagdangat sa P708-billion ang balor sang investments nga nakuha niya sa state visit sa Japan sang nagligad nga Pebrero 8-12, 2023.
Sa vlog sang presidente, iya ginpahayag nga ang Japanese investments ang makapabaskog sang ekonomiya, transportasyon kag employment sa Pilipinas.
Apang, wala pa natumod sang Malacañang kun bala ang mga investments nga ini ang ‘pledges’ pa lamang ukon na-finalize na.
Ginpahayag dugang sang presidente nga ang mga agreements sa Japan ang nagapakita lamang sang maayo kag ‘working’ economy sang pungsod.
Ginpadayaw man sang presidente ang mabaskog nga relasyon sang Pilipinas kag sang Japan sa sulod sang pila ka tuig.
Ang pagpadulong ni Marcos sa Japan ang ika-siyam na niya nga state visit sa sulod sang pito ka bulan nga pagpungko bilang presidente kag ikatatlo subong nga tuig.
