Ginpangunahan ni Pope Francis ang New Year’s Day services sa Vatican sa atubang sang linibo ka mga Katoliko kun sa diin iya man espesyal nga ginkilala ang nagtaliwan nga si Pope Emeritus Benedict XVI.
Sa mass for peace sa St. Peter’s Basilica, ginsiling ni Pope Francis nga ginatugyan sini ang pope emeritus sa most holy mother (the Virgin Mary) agud sundan siya sa iya pagpanglakaton halin sa kalibutan pabalik sa Ginuo.
Sa Sunday Angelus prayer sa St Peter’s Square, nagduko naman ang Santo Papa kag may yara sang malawig nga paghipos bilang pagdumdum sa napatay nga German Pope.
Disyembre 31 sang napatay si Benedict sa monasteryo sa sulod sang Vatican bangud sa katigulangon.
Sa Lunes sang aga oras sa Vatican, isaylo ang iya lawas sa St. Peter’s Basilica kun sa diin pahanugutan ang publiko sa sulod sang tatlo ka adlaw nga makaduaw kag makahatag sang respeto sa anay Santo Papa.
Kada adlaw, ginalauman nga 30,000 ka mga tawo ang magabisita sa St. Peter’s Basilica. At least 1,000 police officers ang iga-deploy suno sa isa ka security official.
May volunteers man nagikan sa national civil protection agency nga magahatag sang assistance sa mga maga-partisipar sa funeral kag may yara man sang ambulances.
Suno pa sa Vatican, lauman nga mangin solemn kag simple ang seremonya.
Ilubong si Pope Emeritus sa papal tombs sa idalom sang St. Peter’s Basilica. Matandaan nga sang 2005 natabo ang katapusan nga lubong sang Santo Papa, sang napatay si John Paul II kag halos milyon nga mga tumuluo kag heads of state ang nagtambong.
Kahapon, Enero 1, gin-release man sang Vatican ang una nga pictures ni former Pope Benedict XVI matapos nga ginbawian ini sang kabuhi.
Suksok sini ang pula kag gold vestments kag ang gold miter ukon headdress. Tradisyonal na nga ginapasuksukan sang pula ang mga Santo Papa sa ila nga haya.
May yara man sang rosary sa kamot sang anay Santo Papa.
Ginpahayag nga kuha ang amo nga pictures sang Enero 1 samtang yara ang bangkay sa chapel sang Mater Ecclesiae Monastery.
