Ginhangkat ni suspended Bureau of Corrections (BuCor) chief Gerald Bantag ang mga nag-akusar sa iya nga pamatud-an kun ano ka matuod nga nagpangbuno siya sang inmates sa sulod sang New Bilibid Prison (NBP) subong nga tuig.
Suno kay Bantag, natak-an na siya magsabat sa tuman ka damo nga akusasyon nga ginhaboy sa iya gani hulaton na lang niya nga mapamatud-an sang pihak nga kampo ang ila alegasyon.
Kasunod ini sang pag-execute sang duha ka inmates sa Muntinlupa City sang sworn affidavits nga nagpahayag nga ginbuno sila ni Bantag samtang hubog ini sa sulod mismo sang NBP.
Si BuCor Officer-in-Charge Gregorio Pio Catapang ang nagpresentar kanday Jonathan Canete sang ‘Batang Cebu’ gang kag Ronald Usman sang ‘Batang Mindanao’ gang sini lang nga semana.
Suno kay Catapang, magahingyo siya sa Commission on Human Rights (CHR) nga buligan ang duha ka gang leaders sa pag-file sang kaso batok sa suspended BuCor chief.
Suno kay Usman, magareklamo siya bangud na-paralyze gid ang iya tuo nga kamot bangud ginbuno ni Bantag sang Pebrero 1,2022.
Ginapahayag nga nabun-an naman si Canete sa iya wala nga paa sang amo man nga adlaw.
Ginapahayag nga natabo nga insidente sang Pebrero sang ginpatawag sila sa opisina ni Bantag kasunod sang pag-eskapo sang isa ka preso sang Enero.
Suno pa sa gang leaders, tuman ka hubog si Bantag rason nga nagpanakit ini tubtub nga nagpangbuno.
Pagkaaga suno sa duha ka gang leaders, ginpatawag sila liwat kag ginhatagan sang P50,000 kag ginpahog nga mas madamo ang ila nga abagahon nga problema kun indi pagbatunon ang ginatanyag nga kuwarta.
Matandaan nga temporaryo nga suspended si Bantag sa iya nga pwesto bangud sa gina-alegar nga involvement sini sa pagpatay sa veteran broadcaster nga si Percy Lapid. ##
