Nang-agaw na naman sang atensyon ang away sang mga Duterte kag Marcos bangud sa panibag-o nga pahayag ni Davao City Mayor Sebastian “Baste” Duterte — apang sa sini nga tion, indi para kay President Ferdinand Marcos, Jr. kundi para sa utod sini nga si Senator Imee Marcos nga naga-claim nga kaalyado man mismo sang mga Duterte.
Ini kaangot sa ginpahayag ni Senator Imee sang nagligad nga adlaw nga sulit-sulit nga nag-sorry sa iya si Mayor Baste bangud sa ginpangbuy-an sini nga mga tinaga batok kay President Marcos.
Matandaan nga sa prayer rally sa Davao City sang nagligad nga semana, nagpanawagan si Mayor Baste kay President Marcos nga mag-resign na lang sa puwesto kag gintawag man niya ini nga “matamad”.
Sa bag-o nga post sang alkalde, ginsiling sini nga luyag lang sini nga klaruhon ang mga ginpangwaragwag ni Senator Imee sa media.
Suno kay Mayor Baste, nagpangayo lang siya sang pasensya bangud naluoy siya sa senadora — apang indi bangud sa iya ginpanghambal sa presidente.
“Madame Imee, linawin ko lang kasi ginagamit mo na sa drama mo diyan sa media. Humingi ako ng tawad dahil naawa ako sayo, hindi dahil sa mga sinabi ko tungkol sa kapatid mo na presidente,” pahayag ni Mayor Baste.
Ginpaandaman man sini ang senadora nga untaton na ang amo sini nga mga istorya kag indi pagbaliskadon kun ano gid ang natabo.
“Stop it with your words. I let it pass the first time, but you still haven’t stopped,” pahayag pa sang mayor sang Davao sa Bisaya.
Sunod man nga nag-post si Senator Imee nga naka-istoryahanay na sila ni Mayor Baste kag “okay” na.
Pahayag pa sini, indi na siya basta-basta mag-istorya bangud sa nagakatabo nga ginamo subong, madali na lang nga mangbali kag magbutang sang sala nga kahulugan sa mga bagay-bagay.
Nagpalagtik man ini nga “daw” may gusto nga mag-away sila. “Naku, hindi na ako basta-basta magkukwento at sa kaguluhan ngayon ay napakadaling baliin at bigyan ng maling kahulugan. Parang may gustong mag-away kami. Buti at nagkausap na kami.”
Nahibaluan nga sunod-sunod ang istorya sang away sang kampo sa tunga nanday President Marcos kag mga Duterte halin sang katapusan sang Enero.
Nauna naman si anay President Rodrigo Duterte sa pag-akusar kay Marcos nga yara sa narcotics list — butang nga ginpanginwala naman sang Philippine Drug Enforcement Agency. Gintawag man sini anay ang presidente nga “bangag” kag “drug addict”.
Ginkadlawan lamang ini ni Marcos kag ginsiling nga ang akto ni anay President Duterte ang posible resulta sang gina-inom sini nga painkiller nga fentanyl nga may yara sang adverse side effects.#
