ILOILO CITY- Nag-apelar ang King of Talk nga si Boy Abunda sa publiko nga indi paghusgaran sanday Bea Alonzo kag Dominic Roque matapos nga nagbulagay na ang mga ini.
Ini kasunod sang pagbasol sang mga netizens kay Bea Alonzo nga amo ang ginatudlo nila nga may problema rason nga nagbulagay sila ni Dominic kun sa diin ginhimo pa nila nga ehemplo ang nauna nga mga relasyon ni Bea kanday Gerald Anderson, kag Zanjoe Marudo.
Suno kay Tito Boy, may yara man sang nagabasol kay Dominic kun sa diin ginsiling sang iban nga tawo nga wala ini sang kwarta kag indi manggaranon gani ginbayaan ini ni Bea.
Pangabay ni Abunda, apisar nga may freedom of speech, kinahanglan sa gihapon nga indi magkomento sang malain ilabi na nga wala sang sin-o man nga nakahibalo sa bilog nga detalye sa pagbulagay sang duha.
Matandaan nga nangin engaged sanday Bea kag Dominic sang Hulyo matapos nagsugod ang ila relasyon sang 2021.
Sini lang nga holiday break, nagbiyahe pa ang duha sa Sapporo, Japan kag ginselyohan pa nila ang ila paghigugmaanay sa Mount Moiwa apang natapos sa gihapon sa pagbulaganay.
