Magapatigayon sang assessment ang mga organizers sang 2022 Winter Games sa Beijing, China agud istoryahan ang may kaangtanan sa epekto sang pagpaiway sang Tokyo Olympics tubtob sa masunod nga tuig.
Suno sa mga organizers sang Winter Games, nakig-angot na sila sa International Olympic Committee agud tsekyaron nga kontrolado nila ang ‘special situation’
Dugang sang natungdan, on target na ang ila pagpanghanda kag wala na sila sang plano nga i-delay pa ang nasambit nga event apisar nga anum lang ka bulan ang lang-at sang Summer kag Winter Olympics.
Nahibaluan nga sang gintalikdan lang nga semana, nahisugtan sang International Olympic Committee kag mga local organizers nga temporaryo nga ipaiway ang pagapatigayon sang Tokyo Games bangud sa Coronavirus Disease 2019 pandemic.
Nahisugtan nga patigayunon ang Tokyo Olympics sa Hulyo 23 tubtob Agosto 8 sa masunod nga tuig samtang ang Beijing Games naman ang magabukas sa Pebrero 4, 2022.
