ILOILO – Gina imbestigaran na sang Bureau of Jail Management and Pennology 6 ang gina alegar pagpangsakit ni Vicente ‘Itik’ Espinosa sa isa ka collector sa sulod mismo sang iya hospital room samtang naka hospital arrest sya kun sa diin nakabantay ang pila ka mga jail guards sang Iloilo District Jail-Nanga.
Ang collector ang ginkilala nga si Ruth Gabion sang Bry. Tanza Bonifacio, Iloilo City Proper kag collector ni Espinosa.
Sa interview sang Bombo Radyo kay Jail Insp Henry Harder, ang chief sang Operations Divison sang Regional Bureau of Jail Management and Pennology 6 iya ginpahayag nga nag umpisa na ang ila imbestigasyon matapos nila mabaton ang report nagikan sa warden sang Iloilo District Jail-Nanga.
Suno kay Harder, base sa report nga iya nabaton nabatian sang mga jail guards nga naga hibi si Gabion sa sulod sang kwarto kag nangayo pa ini sang bulig sa mga jail guard apang ginhambalan lang nila ini nga maghipos bangud maka distorbo sa iban nga pasyente.
Kun mapatud-an ang nasambit nga report, may yara sang salabton ang BJMP kag nagakadapat lang nga atubangon nila ini.
Nagpasalig ang BJMP nga gilayon nila ipahibalo sa publiko ang resulta sang imbestigasyon sa tion nga matapos na ini.
May kaangtanan naman sa pagka hopital arrest ni Espinosa, ang iya nga doktor lang ang maka determine kun pwede na sya ma transfer sa jail facility apang mahimo man sila maka patigayon sang medical check up paagi sa Health Services Unit nila kag ipresentar sa korte nga amo ang maga desisyon kun magapabilin sa gihapon si Espinosa sa hospital.
Dugang sang natungdan, sa subong wala pa sila may nabaton nga medical report ni Espinosa nagikan sa iya lima ka mga doktor.
Madumduman nga sang Agosto 10 subong lang nga tuig naaresto si Espinosa sa Iloilo International Airport bangud sa kaso nga pagpatay kay anay Ajuy Vice Mayor Ramon Rojas.
Samtang sang Oktubre naman subong man nga tuig nadakpan naman ang mga tinawo ni Espinosa nga nagpasulod sang makahululubog nga ilomnon sa iya kwarto sa hospital kag sang Nobyembre 25 gin turn over na sang Cabatuan Municipal Police Station ang kustudiya kay Espinosa sa Bureau of Jail Management and Penology partikular sa Iloilo District Jail-Nanga.
