Gin-realign sang Kamara ang ₱77.5 billion sa proposed 2023 national budget agud pasakaan ang alokasyon sa health, education, transportation, kag iban pa nga social services.
Suno kay House Speaker Martin Romualdez, ginlakip sang Kamara ini nga institutional amendments sa aprubado nga version sang 2023 General Appropriations Bill (GAB).
Yari ang breakdown sang realignment:
– ₱20.25 billion para sa nagkalain-lain nga mga programa sang Department of Health
– ₱500 million para sa University of the Philippines–Philippine General Hospital
– ₱10 billion para sa school building, classroom construction, kag special education programs sang Department of Education
– ₱10 billion para sa Department of Public Works and Highways
– ₱12.5 billion para sa Department of Social Welfare and Development
– ₱5.5 billion para sa mga programa sang Department of Transportation nga maga-address sa nagasaka nga presyo sang gatong
– ₱5 billion para sa training kag scholarship programs sang Technical Education and Skills Development Authority
– ₱5 billion para sa Tulong Dunong Program sang Commission on Higher Education
– ₱5 billion para sa livelihood kag emergency employment programs sang Department of Labor and Employment
– ₱1.5 billion para sa national broadband project sang Department of Information and Communications Technology
– ₱500 million para sa new building sang Commission on Elections
– ₱300 million para sa training sang Philippine National Police sa law enforcement officers nga patigayunon sang Department of Justice kag National Prosecution Service
– ₱250 million para sa Department of Trade and Industry agud i-assist ang creative industry pursuant sa Republic Act 11904
– ₱150 million para sa Energy Regulatory Commission
– ₱147 million para sa Office of the Solicitor General
– ₱50 million para sa barangay and sitio electrification program sang National Electrification Administration
Suno kay Appropriations Committee Chairman Representative Zaldy Co, naghalin ang dugang nga budget sa mga ahensya kun sa diin ginapanan-aw nga indi man maubos ang ila pondo sa 2023 — sandig sa historical performance ukon sa specific circumstances sang ila spending program.
P50 billion ang ginkuha gikan sa proposed budget sang Department of Transportation nga amo kuntani ang gamiton para sa Metro Manila Subway Project kag North-South Railway Commuter sa masunod nga tuig.
Wala na-mensyonar sang Kamara kun sa amo nga realignments, may ginkuha man nga pondo gikan sa kontrobersyal nga lump sums kag surveillance funds nga ginapakamalaot sang oposisyon, kaangay sang confidential kag intelligence funds sa idalom sang mga opisina nanday President Ferdinand ‘Bongbong’ Marcos, Jr kag Vice President Sara Duterte-Carpio. ##
