Napasakaan na sang panumbungon nga murder kag frustrated murder ang suspek sa pagpangluthang sa duha ka mga babaye sa Brgy. Ungka I, Pavia, Iloilo.
Sa interview sang Bombo Radyo kay Police Staff Sergeant Warren Talamor, imbestigador sang Pavia Municipal Police Station, iya ginpahayag nga kaina sang aga gin-file ang complaints batok kay Lloyd Katipunan.
Suno kay Talamor, makabig na nga ‘case closed’ ang kaso kasunod sang pagkakilala sa suspek kag pagpasaka sang amo nga complaints.
Madumduman nga natabo ang insidente sang Martes sang gab-i, Abril 14.
Ang biktima nga ginbawian sang kabuhi amo si Divine Grace Castillo, plant manager sang Goldilocks Pavia; samtang ang nasamaran naman amo si John Shane Samblingo, isa ka Human Resource Officer sang amo man nga bakeshop.
Nagsakay sa motorsiklo ang suspek kag nagpwesto sa kilid sang karsada kag ginbantayan ang duha agud himuon ang krimen.
Ginalantaw nga kaakig kag dumot ang motibo sa krimen matapos nga nangin subject to termination ang suspek bangud ginapahayag nga makapila ka beses nga nadakpan nga nagakatulog samtang yara sa trabaho.
Antes sini, may record man si Katipunan sang pagpangluthang sa iya lead security officer sa isa ka call center tower sa Barangay Bolilao, Mandurriao, Iloilo City sang 2023 apang nagpalagyo siya sang amo nga tion.#
