ILOILO CITY- Gin-athag sang chairman sang infrastracture committee sang Regional Development Council nga indi pagpangita sang sala ang ila trabaho kundi mangita sang pamaagi agud maduso ang pag-uswag.
Ini nahanungod sa ginpatigayon nga Regional Development Council meeting kahapon nga gintambungan man sang tiglawas sang Department of Public Works and Highways kag isa sa agenda amo ang estado sang Ungka flyover.
Sa amo nga meeting,wala napunggan ni Mayor Jerry Treñas,chairman sang amo nga committee, nga magtaas ang tingog sa pagpabutyag sang pagkadismaya sa kapalpakan sang Department of Public Works and Highways sa pagtukod sang proyekto.
Sa interview sang Bombo Radyo kay Mayor Jerry Treñas, iya ginpahayag nga luyag lang niya nga ma- address ang concern kag mapadasig ang rehabilitasyon bangud pumuluyo ang nagaantos.
Suno sa alkalde, kun may yara lamang sang magamit nga pondo, madasig lang ang pagtrabaho apang kinahanglan pa nga maghulat tubtob sa 2024 para masugudan ang detailed engineering plan halin sa 3rd party consultant nga nag-propose sang P250million nga initial fund para sa pagkaayo sang flyover.
Matandaan nga ginsermonan ni Treñas si Department of Public Works and Highways Undersecretary Roberto Bernardo sa amo nga meeting bangud wala nagustuhan sang alkalde ang panabat sang opisyal sa pamangkot.
Namangkot ang alkalde kay Bernardo kun may bastante nga budget ang pagpalapad sang dalan sa kilid sang Ungka flyover bilang alternatibo nga solusyon agud temporaryo nga mahagan-hagan ang mabug-at nga trapiko sa lugar apang wala ini masabat direkta sang opisyal,sa baylo ginpamangkot pa niya ang alkalde kun porsyon pa sang national road ang masakop sang road widening.
Didto na ginsing-alan ni Treñas si Bernardo nga magpamati agud makasabat sa iya pamangkot.
