ILOILO CITY – Ginlunsyar sang China ang spaceship nga magadala sang tatlo ka mga astronauts para sa isa ka mission nga magakumpleto sang pinakauna nga space station sang pungsod kag magasugod sang operasyon sini.
Suno kay Chinese President Xi Jinping, ini na ang magahimo sang ila pungsod bilang isa ka space power.
Naglupad ang isa ka rocket nga nagadala sang Shenzhou-15 spaceship nagikan sa Jiuquan Satellite Launch Center sa northwest province sang Gansu suno sa China Manned Space Agency.
Sa tion nga maka-dock na ang spaceship sa Tianhe core module, makumpleto na ang Tiangong space station.
Ang tatlo ka mga Chinese astronauts ang maga-upod sa tatlo ka iban pa nga on board na nga daan humalin sang Hunyo.
Ang tatlo ka mga lalaki nga astronauts nga lunsay katapo sang People’s Liberation Army ang magatinir sa space station sa sulod sang anum ka bulan kag buslan ang tatlo nga onboard.
Ang T-shaped space station ang may yara sang tatlo ka mga lab modules kag ang mga astronauts ang magapatigayon sang masobra sa 40 ka mga experiments sa field sang space science research, medicine and technology kag extravehicular activities.
