ILOILO CITY – May yara na sang ginpahamtang nga common quarantine area sa Pavia, Iloilo.
Sa interview sang Bombo Radyo kay Mayor Luigi Gorriceta, iya ginpahayag nga ang common quarantine area nga yara sa Pavia Pilot Elementary School kag may yara sang 30 ka kwarto ang mahimo na nga magamit sang mga Persons Under Investigation.
Suno kay Gorriceta, naumpisahan naman ang pagpanghatag sang ayuda kaangay na lang sang relief goods para sa mga pumuluyo nga nadulaan sang trabaho bangud sa ginpatuman nga Enhance Community Quarantine.
Isa man sa problema suno kay Gorriceta amo ang nagapalapta sang sala nga impormasyon sa social media matapos nadakpan ang isa ka persona nga nagpalapta sang sala nga impormasyon nga may yara sang Persons Under Investigation sa isa ka barangay sa Pavia.
Suno kay Gorriceta, indi sa gihapon malikawan nga may yara sang nagapalapta sang sala nga impormasyon gani, hugot ang iya panghingyo nga unatatan na ini.
Nahibaluan nga sa subong, may yara na sang 237 ka Persons Under Monitoring sa Pavia sa diin 154 diri ang nakatapos na sa 14 ka adlaw nga quarantine samtang 23 naman ang Persons Under Monitoring nga nakitaan sang mild symptoms sang nasambit nga virus.
