Kumpyansa ang mga barangay officials sa syudad sang Iloilo nga magpangampanya para sa ila nahamut-an nga kandidato sa 2022 elections apisar ginsulit sang isa ka opisyal sang Deparment of the Interior and Local Government (DILG) nga mahimo sila makakas sa posisyon kun himuon ini.
Una diri, sa interview sang Bombo Radyo kay DILG Undersecretary for Barangay Affairs Martin Diño, ginplastar sini ang Commission on Elections (Comelec) kag Civil Service Commission Joint Circular No. 001, series of 2016, nga napetsahan sang Marso 29, 2016.
Suno kay Diño, maathag sa joint circular nga indi pwede makapangampanya ang barangay officials — buot silingon dala diri ang barangay captains, barangay kagawad, barangay secretary, kag barangay treasurer.
Ginpahayag pa ni Diño nga ang exempted lang sa non-partisan activities amo ang higher national and local officials.Nagpaandam ini nga ang madakpan nga nagalapas sa sini nga joint circular ang pwede mangatubang sang suspensyon ukon makakas sa posisyon bangud ipasa ang pangalan sa Comelec.
Sa interview naman sang Bombo Radyo kay Punong Barangay Roberto Niño, spokesperson sang Liga ng mga Barangay sa syudad, iya ginpahayag nga wala nabutang sa layi nga indi pwede maka-endorso sang kandidato ang barangay officials.
Ang nakabutang lang sa layi suno kay Niño amo ang non-partisanship sa tion sang BARANGAY ELECTIONS.
Wala nakabutang suno kay Niño ang partisanship sang elective barangay officials. Kun may Joint Circular No. 001, series of 2016 suno kay Niño, mas mataas sa gihapon kun ano ang nakabutang sa layi.
Ginpahayag man ni Niño nga handa nga magsabat ang Liga ng mga Barangay kun hinali may barangay official nga pasakaan sang administrative case bangud lang sa pagpangampanya para sa isa ka kandidato sa 2022 elections. ##
