ILOILO CITY – Ginkontra sang Department of National Defense ang pahayag ni Chinese Ambassador Huang Xilian nga ang Pilipinas ang nagadabok sa geopolitical tensions pinaagi sa paghatag sang access sa Estados Unidos sa military bases sini malapit sa Taiwan.
Sa pahayag sang spokesperson sang ahensya nga si Arsenio Andolong, ginpanindugan sini nga wala naga-intra ang Pilipinas sa internal affairs sang China sa independent country.
Sa separado nga statement, ginklaro ni National Security Council spokesperson Assistant Director General Jonathan Malaya nga wala sang intensyon ang pungsod nga magpahilabot sa isyu sa Taiwan kag indi pagpahanugutan nga gamiton ini sang pungsod agud nga mag-intra sa nasambit nga isyu.
Ang Taiwan ang ginakabig sang China nga teritoryo sini nga nagaplano nga pwersahan nga i-reclaim sini kun kinahanglan.
Sang Byernes, gin-abisuhan ni Huang ang Pilipinas nga pamatukan ang ginapakigbato nga kahilwayan sang Taiwan sa baylo nga hatagan sang access ang Estados Unidos sa military facilities malapit sa Taiwan Strait kun naga-ulikid gid man ang Manila sa 150,000 overseas Filipino workers sa Taiwan.
Suno kay Andolong, ang nagapanguna nga concern sang Pilipinas sa Taiwan amo ang seguridad sang mga Pilipino nga nagapuyo kag nagatrabaho sa isla.
Nakahanda naman ang ahensya para sa anuman nga contingencies agud nga masiguro ang safety sang mga Pilipino sa luwas sang pungsod ilabi na sa Taiwan.
Gin-reject man sang Department of National Defense ang pagkumparar ni Huang sa sitwasyon sa Taiwan sa problema sa insurhensya sa Mindanao.
Dugang pa ni Andolong, katuyuan sang ahensya nga mapasanyog ang defense capabilities sang pungsod kag ginsulit nga ang pagpatuman sang Enhanced Defense Cooperation Agreement ang indi kontra sa anuman nga pungsod.
Suno naman kay Malaya, personal nga ginpasalig ni National Security Adviser Eduardo Año si Huang sa isa ka meeting sang nagligad nga semana nga ang mga agreement sites ang indi para sa offensive operations batuk sa China ukon pag-intra sa isyu sa Taiwan kundi, katuyuan sini nga mahatagan sang proteksyon ang territorial integrity sang pungsod.
