Ginkumpirmar sang Department of Health ang apat ka panibag-o nga kaso sang Coronavirus disease 2019 sa Pilipinas.
Sa subong may yara na sang 10 ka kaso sang COVID-19 sa pungsod.
Sa ginpagwa nga impormasyon sang Department of Health ang ika-pito nga kaso amo ang isa ka 38-anyos nga lalaki nga Taiwanese foreign national nga nagbisita sa Pilipinas kag nagpositibo sa COVID-19 sa Taiwan.
Isa ka 32-anyos naman nga lalaki nga Pinoy ang ika-walo nga pasyente nga nagpadulong sa Japan sa sulod sang 14 ka adlaw sa diin nagsugod ang iya sintomas sang Marso 5.
May history naman sang pagbiyahe sa Estados Unidos kag South Korea ang ika-siyam nga kaso nga isa ka 86-anyos nga Amerikano nga lalaki nga nagsugod ang sintomas sang Marso 1.
Wala naman sang travel history ang ika-10 nga kaso nga isa ka 57-anyos nga Pilipino nga ginapahayag nalatnan sang may COVID-19 nga gina imbestigahan na sang Department of Health subong.
Suno sa Department of Health, ang mga bag-o nga kaso sang COVID-19 ang yara na sa pribado nga ospital.
Nagpanugyan naman si Department of Health Sec. Francisco Duque III sa publiko nga kun sin-o man ang may yara sang hilanat ukon anuman nga sintomas sang COVID-19 kag na-expose sa may sakit ang gilayon nga makipag-angot sa ila talatapan ukon magtawag sa hotline sang ahensya (02) 8-651-7800 local 1149-115.
Madumduman nga ang tatlo ka una nga kaso sang COVID-19 sa Pilipinas ang lunsay mga Chinese nga na rekord sang Enero kag Pebrero samtang nadugangan naman ini sang duha ka mga Pilipino kag ang ika-anum naman ang asawa sang isa sa mga pasyente.
Samtang, apat naman ka mga Pilipino sa Hongkong ang nagpositibo sa nasambit nga balatian kag tatlo naman sa Singapore.
