Ginpabugal ni Department of Health Secretary Franciso Duque nga sa sulod sang apat ka semana, wala pa sang narekord nga local transmission sang COVID-19 sa pungsod.
Ini matapos nga gindeklarar sang World Health Organization nga isa ang Pilipinas sa mga pungsod nga madasig nga na kontrol ang paglapta sang virus.
Ginpanginwala naman sang natungdan nga nagakulang na ang pondo sang ahensya nga ginahatag sa kinahanglanon sang mga health workers nga naga atipan sa mga repatriates nga naka quarantine sa New Clark City, Capas Tarlac.
Nahibaluan nga halos P2 bilyon ang ginpangayo nga dugang nga pondo sang Department of Health sa gobyerno agud dugangan ang ila nga medical supplies.
Suno kay Duque, ginkumpirmar sa iya sang Department of Budget and Management nga mahimo na nila magamit ang P530 milyon nga allocated budget agud ipamakal sang medical equipment.
Ginahulat man sang ahensya ang delivery sang halos P95 milyon nga balor sang personal protective equipment nga pagagamiton sang mga health workers.
Ginaplano man sang Deparment of Health ang expansion sang sub-national laboratories sa pungsod agud mas mapadasig ang ginapatigayon nga testing sang coronavirus.
