Posible nga magapangatubang sang reckless imprudence ang driver ukon operator sang modernized jeep nga may dako nga gisi sa ruweda sini kag naga-byahe pa sang depampasahero nga salakyan sa syudad sang Iloilo.
Sa interview sang Bombo Radyo kay Atty. Gaudioso P. Geduspan II, Regional Director sang Land Transportation Office (LTO) Region VI, iya ginpahayag nga delikado gid kun may ara sang guba ang salakyan samtang nagabyahe bangud posible ini mag resulta sang aksidente.
Pahayag pa sang Regional Director nga may ara sang responsibilidad ang mga operators sang mga Modernized Jeepney nga i-check ang ila public transportation vehicles agud indi magtuga sang disgrasya sa publiko.
Dugang pa ni Atty. Geduspan importante nga may ara sang inspector nga iga-deploy sa nagkalain-lain nga terminal sang mga Modernized Jeepney.
Ini agud suno sa iya nga mahatagan gilayon sang nagakaigo nga solusyon kun may ara sang magluntad nga problema kag agud makalikaw sa aksidente ang mga commuter.
