Nagpaguwa na ang Department of Trade and Industry (DTI) sang latest nga “Gabay sa Pamimili ng School Supplies” ukon School Supplies Price Guide para sa School Year 2026-2027.
Ini samtang nga ginapreparahan na sang mga ginikanan ang galamiton sang ila kabataan sa eskwelahan bangud nga inadlaw na lang ang ginahulat kag dalayon na nga magabukas ang bag-o nga school year.
Covered sini nga guide ang suggested price ranges para sa masami ginabakal nga school items lakip na ang notebooks, pad papers, pencils, ballpens, crayons, erasers, sharpeners, kag rulers.
Sa pinakaulihi nga advisory sang DTI, ang presyo sang writing kag composition notebooks nga may 80 leaves naga-range halin P13 tubtob P52, samtang ang spiral notebooks naga-range sang P14 tubtob P49, kag ang yarn notebooks P14 tubtob P47.
Ang grade pad paper naman may presyo nga P13 tubtob P37 kada pad ukon pakete, samtang ang intermediate pad paper naga-range sang P22 tubtob P69.75 kada pad.
Para sa writing materials, ang lapis may presyo nga P12 tubtob P18 kada isa, kag P15 tubtob P24 kada pakete.
Ang ballpen naman naga-range sang P3 tubtob P21 kada isa, kag P18 tubtob P27 kada pakete.
Sa pihak nga bahin, ang mga crayons may presyo nga P12 tubtob P114 kada kahon, depende sa kadamuon sang kolor, samtang ang mga eraser naga-range sang P8 tubtob P20 kada isa.
Ang mga sharpener may presyo nga P16 tubtob P69, kag ang mga ruler naman P8 tubtob P32.
Suno sa DTI, ang price guide ginhimo agud hatagan sang mas madamo nga options ang mga konsumidor samtang nagabakal sila sang school supplies antes magsugod ang bag-o nga tuig sa eskwelahan.
Ginpahanumdom man sang ahensya sa mga bumakal nga usisaon gid ang label kag specifications sang produkto agod masiguro nga de-kalidad kag na-label sang maayo ang ila ginabakal nga mga gamit.
