WESTERN VISAYAS – Ginkumpirma ni Department of Labor and Employment Region 6 Director Atty. Sixto Rodriguez nga gin-aprubahan na sang Regional Tripartite Wages and Productivity Board ang dugang nga sweldo para sa mga private employees sa Western Visayas.
Sa interview sang Bombo Radyo kay Director Rodriguez, iya ginpahayag nga gin-aprubahan sang RTWPB ang wage increase halin P33 tubtob P40 para sa mga mamumugon nga nagatrabaho sa mga private establishments kag P1,000 naman para sa mga kabulig sa rehiyon 6.
May yara man sang dugang nga P33 para sa non-agricultural ukon ang may yara sang masobra 10 ka mga empleyado sa diin halin sa P480 nga sweldo subong, makabaton na sila sang P513 nga sweldo kada adlaw.
Samtang may dugang man nga P35 para sa non-agricultural nga may 10 ka mga empleyado panubo halin sa P450 nga swledo, makabaton na sila sang P485 nga sweldo kada adlaw.
Para naman sa mga agricultural workers, may yara sang dugang nga P40 nga sweldo halin sa P440 nga mangin P480.
Dugang nga P1,000 kada bulan naman ang sweldo sang mga kabulig halin P5,000 nga mangin P6,000.
Ang aprubado nga wage order ang ipasa sa National Wages and Productivity Council para nga i-review agud siguruhon nga na-comply sang RTWP ang basic requirements.
Mangin epektibo ang dugang nga sweldo, sa tion nga ini na ang ma-publish.
