Magapadulong na sa China subong nga adlaw, Enero 3, si President Bongbong Marcos para sa state visit nga magalawig tubtub sa Enero 5.
Suno kay Foreign Affairs Assistant Secretary for Asian and Pacific Affairs Nathaniel Imperial, ginalauman nga makapirma ang Philippine delegation sang 10-14 ka bilateral agreements kaupod ang China sa amo nga state visit.
Lakip sa sini nga agreements amo ang cooperation sa trade and investments, agriculture, renewable energy, infrastructure, development cooperation, people-to-people ties, kag maritime security.
Magapakigkita man si Marcos kay Chinese leader Xi Jinping.
Ginalauman man nga may pirmahan nga kasugtanan agud maka-establisar sang direct communication sa tunga sang foreign ministries sang duha ka pungsod agud malikawan ang miscalculation kag miscommunication sa West Philippine Sea.
Una na nga ginpahayag ni Marcos nga target niya nga mapasangkad pa ang relasyon sang Pilipinas kag Beijing, kag nagpromisa man ini nga indi niya pag-ibandonar ang bisan ano ka gamay nga parte sang West Philippine Sea nga kabahin sang teritoryo sang Pilipinas.##
